Na Mwandishi Wetu
Jumla ya Wanafunzi 80,000 kutoka katika Mikoa ya Dar es Salaam, Ruvuma, Arusha, Kilimanjaro, Geita na Ruvuma wamenufaika na mafunzo yatolewayo na Kampuni ya Puma kuhusu usalama Barabarani.
Hayo yamesemwa na Mwenyekiti wa Baraza la Taifa la Usalama Barabarani ambae pia ni Naibu Waziri wa Mambo ya Ndani ya Nchi, Mhandisi Hamad Masauni wakati wa Uzinduzi wa Mpango wa Usalama Barabarani kwa Wanafunzi wa Shule za Msingi Tanzania Bara na Visiwani,uliofanyika leo jijini Dar es Salaam.
Akizungumza wakati wa uzinduzi huo Naibu Waziri Masauni alisema tangu program hii ianzishwe jumla ya wanafunzi 80,000 wamenufaika lengo ikiwa ni kuwalinda watoto hawa ambao ni Taifa la kesho na madhara yanayotokea barabarani ikiwemo ajali.
“Sote tunagundua maendeleo ya Taifa lolote yanaletwa na watu, watoto hawa ni Taifa la kesho tunaotegemea watatuletea maendeleo,Serikali tunafanya juhudi za makusudi kuwalinda watoto hawa na tayari takribani watoto 80,000 washanufaika na mafunzo haya na lengo letu tuwafikie wengi zaidi” alisema Masauni
Akizungumza katika uzinduzi huo, Mkurugenzi Mtendaji wa Kampuni ya Puma, Dominic Dhanah alisema wao kama kampni ya mafuta na wadau wakubwa wa usalama barabarani watajitahidi kuzifikia shule nyingi zaidi na kuisaidia serikali kulinda viongozi hao ambao anaamini ni nguvu kazi ya Taifa hapo baadae.
“Sisi Puma tukishirikiana na Kikosi cha Usalama Barabarani cha Jeshi la Polisi na wadau wengine tutaendelea kuhakikisha tunalinda maisha ya wanafunzi hawa na mpango wetu ni kuzifikia shule nyingi zaidi katika mpango huu wa kutoa elimu kwa wanafunzi” alisema Dominic
